مطربين لنجمة وُلدت مبكراً

مطربين كتير بيحتاجوا لأكتر من ألبوم لحد ما الناس تعرفهم، لكن "زيزي عادل" طالبة "ستار أكاديمي" السابقة فالأمر معاها مختلف. باعتبارها كانت مرشحة للحصول على اللقب وخروجها الدرامي الذي أطلق حملة تعاطف قومي مع الموهبة المصرية المظلومة، فإن زيزي عادل وُلدت نجمة، ولم تعد مظلومة أبداً بعد الآن..

صوت زيزي من الأصوات اللي تتعاطف معاها، بمعنى إنك لو موقعتش في غرامه، فمتقدرش تنكر إنه صوت جيد. صوتها دافي وبتغني مظبوط لكن واضح إنها محتاجة تتدرب أكتر عشان تخرّج أفضل ما عندها..

حاولت زيزي مع فريق عملها تقديم حالات رومانسية متنوعة وصريحة تناسب أي بنت في المنطقة، مفيش مغامرات على مستوى الكلمات والألحان، لكن باعتبارهم اشتغلوا على (تيمات)، فهم عملوا ده كويس قوي..

أغنية الهيد (واحدة طيبة) أعتقد إنها هتعجب بنات كتير طبعاً! (دلوقتي صعب تلاقي واحدة طيبة في زمان مفيش فيه ناس كتيرة طيبين/ جنبك ولو تحتاجها تبقى قريبة ودي في الحياة مش هتقابلها مرتين). هي بتطلب من حبيبها يحافظ عليها ويراعي مشاعرها لإنها ببساطة طيبة! أظن السياق ده جديد نوعاً، الشاعر "نادر عبد الله" كتب الفكرة بشكل جيد جداً ولحن "تامر عاشور" الهادي الشجين لم يكن أقل جودة من الكلمات..

تعالوا نسمع حالة حب هادية ولطيفة وبدون مشاكل في أغنية "إحساسي بيك": (احساسي بيك خد قلبي ليك يا حبيبي/ لو مش حبيبي هاقول لمين يا حبيبي/ مانت عارف قد ايه/ باتمنى اشوفك تاني ليه/ كل اللي كان وحلمت بيه لقيته فيك)، الإيقاع السلو وتوزيع الوتريات الثري والأداء عملوا اللازم..

نروح لجو شرقي أكتر في أغنية "أنا بين ايديك" اللي لحنها "شريف تاج" من مقام الكرد ومنحها إيقاع البَمب المصري، ولا نزال في منطقة الرومانسية، لدرجة باشعر بيها إن الغنوة دي امتداد للغنوة اللي فاتت: (أنا شفتك هي مرة مبقتش ف نفسي حرة/ مبقتش حياتي مُرّة من يوم ما دخلتها/ يا حبيبي انا لو عليّ/ عمري ما اغمض عينيا/ حبك يا حبيبي ليّ بالدنيا كلها)

نيجي للجانب الآخر من الحب، حيث الخلافات والهجر والخصام. عندنا 5 أغاني من أصل 8 بيلعبوا في المساحة دي، (انكسار وهجر وثورة وانتقام)..

الحقيقة إن لحن "نادر نور" (عارف أنا جاية ليه) فرض نفسه كلحن جميل أرشحه لأفضل لحن في الألبوم. احنا أمام حالة انتقام عاطفي (عارف انا جاية ليه، عشان بس اثبت لروحي، مهما جرالك ايه اني نسيتك انت وجروحي، واحس اني ابتديت وانت اللي انتهيت)، وبعد أن تثأر لمشاعرها نصل لذروة الحالة: (عرفت ازاي غاليين دموع العين على عنينا/ عرفت ازاي بنكون لما بتهون امانينا/ وازاي رضينا نموت كدة في سكوت وحبّينا)، لو حد لقى سبب وجيه لوجود كلمة (حبّينا) هنا غير القافية يا ريت يقوللي!

في أغنية (حب مش محسوب) سؤال اتطرح كتير قبل كدة: (انت ناسي انك انت مش ف بالي، جاي بتسأل انت إيه بالنسبة ليّ)، لكن الأغنية تتميز بإنها من مقام البياتي الشرقي في ألبوم يسيطر عليه مقام الكُرد كالعادة.

أغنيتي "مالك بيّ" و"واحدة تانية" اشتركا في سرعة إيقاع الكلام، وحالة ثورة لبنت قوية: (ممكن اعمل حاجة تانية ف لحظة تانية تحس كإني واحدة تانية، أجمّد قلبي أبيع في ثانية) (انا شايفة انها مش مشكلتك فين رايحة وجاية منين/ دي حياتي وانا حرة فيها/ يعني مالكش دعوة بيها/ ما تحل عني واسمعها منّي دلوقتي أيوة هابعد بجد)

على أي حال بنتمنى الأفضل لزيزي في الألبومات القادمة ، وأهلاً بيها موهبة مصرية جميلة ننتظر منها المزيد.